काठमाडौं । बुढानिलकण्ठ स्कुलमा कक्षा १० मा अध्ययनरत तिक्ष्णा राईले आफ्नो जन्मदिनको अवसरमा ‘आमा घर’लाई आर्थिक सहयोग गरेका छन् ।
काठमाडौं महानगरपालिका २९ अनामनगरमा बस्दै आएकी राईले १४ औँ जन्मदिनको दिन ‘आमा घर’आश्रममा पुगेर नगद १२ हजार सहयोग हस्तान्तरण गरेकी हुन् । दिलशोभा श्रेष्ठले सञ्चालन गरेको ‘आमा घर’मा २३ जना सन्तानबाट अपहेलित बनेका आमाहरु बस्दै आएका छन् ।
तिक्ष्णाकी आमा देवीकला राई भन्छिन्, ‘छोरी सानै उमेरदेखि दिनदुखीहरुलाई आर्थिक तथा भौतिक सहयोग गर्नुपर्छ भन्ने भावनाबाट प्रेरित छिन् ।’
आश्रममा जन्मदिन, संघसंस्थाको स्थापना दिवस, वैवाहिक वर्षगाँठ, परिवारका दिवंगत सदस्यको स्मृति तथा अन्य कार्यहरूमा आर्थिक तथा भौतिक सहयोग आउने गरेको ‘आमा घर’सञ्चालिका श्रेष्ठ बताउछिन् । ७५ वर्षकी श्रेष्ठ ३ दशकदेखि समाजसेवामा सक्रिय छिन् ।
