सोलुखुम्बु । सोलुखुम्बु जिल्लाको धार्मिक तथा पर्यटकीय दृष्टिले संवेदनशील रहँदै आएको ज्वालामाई मन्दिर र पिके डाँडा क्षेत्रमा लामो समयदेखि निरन्तर देखिँदै आएको मोबाइल नेटवर्क समस्याले अन्ततः सरकारको ध्यानाकर्षण गरेको छ।
स्थानीय बासिन्दा तथा सरोकारवालाहरूले सूचना तथा सञ्चार सेवामा सुधारको अपेक्षा राख्दै सरोकारवालाहरुको एक टोलीले आज शुक्रबार सञ्चार तथा सूचना प्रविधि मन्त्रालय पुगेर सञ्चारमन्त्री जगदीश खरेललाई औपचारिक रूपमा निवेदन पेश गरेका छन्। विख्यात आरोही स्पीडकाजी शेर्पा नेतृत्वमा गएको टोलीको पत्र बुझ्दै मन्त्री खरेलले उक्त विषयलाई प्राथमिकताका साथ हेर्ने प्रतिवद्धता व्यक्त गर्नुभएको छ।
स्थानीयहरूले बुझाएको निवेदनमा सोलुदुधकुण्ड नगरपालिका–३ का धार्मिक तथा पर्यटकीय क्षेत्रहरूमा नेपाल टेलिकमको मोबाइल सञ्जाल अत्यन्त कमजोर रहेकाले दैनिक जीवन, सुरक्षा, आपतकालीन सेवासमेत प्रभावित भएको उल्लेख छ। पिके डाँडा र ज्वालामाईमा निजी सेवा प्रदायकको सञ्जाल सक्रिय नभएकाले स्थानीय, व्यवसायी र पर्यटक सबैजना नेपाल टेलिकमकै सेवामा निर्भर रहनुपर्ने अवस्था छ। तर टेलिकमकै सञ्जाल टुट्ने, नचल्ने र समयमा काम नगर्ने समस्या वर्षौँदेखि निरन्तर देखिँदै आएको जनाउँदै स्थानीयले टावर निर्माणका लागि आवश्यकता अनुसारको जग्गा उपलब्ध गराइसक्दा पनि काम अघि नबढेको गुनासो गरेका छन्।
मोबाइल सेवा कमजोर हुँदा तीर्थयात्री, पदयात्री र विदेशी पर्यटकलाई यात्रा व्यवस्थापनदेखि समन्वयसम्म गम्भीर कठिनाइ परेको विख्यात आरोही स्पीडकाजी शेर्पाले बताउनुभयो। पिके डाँडा जस्तो दृश्यावलोकनका लागि चर्चित स्थानमा फोन सम्पर्क नहुँदा आपतकालीन अवस्थासमेत जोखिमपूर्ण बन्ने गरेको स्थानीयहरूको अनुभव छ। यस्तै, केही वर्षअघि पिके डाँडामा नेटवर्क उपलब्ध नहुँदा एक पर्यटकले ज्यान गुमाउनुपरेको घटना पनि स्थानीयको स्मृतिमा ताजा छ। यसले सो क्षेत्रमा विश्वसनीय सञ्चार सेवाको आवश्यकतालाई अझ स्पष्ट बनाएको स्थानीय इन्दु रेग्मी मगरको भनाइ छ।
निवेदन बुझाएपछि सञ्चारमन्त्री खरेलले समस्या समाधानका लागि नेपाल टेलिकम र सम्बन्धित निकायलाई तत्काल पहल गर्न निर्देशन दिनुभएको छ । उहाँले सोलुखुम्बु विश्वपरिचित गन्तव्य भएको भन्दै धार्मिक र पर्यटकीय महत्व भएका क्षेत्रमा सञ्चार सेवा सहज र भरपर्दो बनाउन सरकार गम्भीर रहेको स्पष्ट पार्नु भयो। मन्त्री खरेलले, “सोलुखुम्बु जस्तो अन्तर्राष्ट्रिय पहिचान बोकेको क्षेत्रमा सञ्चार सेवा कमजोर हुनु स्वीकार्य हुन सक्दैन। सेवा सुधारका लागि आवश्यक कार्यवाही अघि बढाइनेछ,” भन्दै मन्त्रालयको प्रतिबद्धता व्यक्त गर्नु भयो। मन्त्रीको प्रतिक्रियापछि स्थानीयवासीले वर्षौँदेखि लम्बिँदै आएको समस्यामा अब समाधानको आशा पलाएको बताएका छन्।
पिके डाँडा र ज्वालामाई क्षेत्र वर्षेनी हजारौँ पर्यटक र धार्मिक यात्रुहरू आकर्षित गर्ने स्थलहरू हुन्। हिमश्रृंखलाको मनोरम दृश्य, पदयात्रा मार्ग, स्थानीय संस्कृतिको सौन्दर्य र धार्मिक महत्वले यहाँको आकर्षण बढाइरहेको छ। तर विश्व–पर्यटकीय सम्भावना बोकेको क्षेत्रमा सञ्चार सेवा जस्ताको त्यस्तै रहँदा पर्यटन प्रवर्द्धनदेखि जनजीवनसम्म प्रभावित हुँदै आएको छ। व्यवसायी, होटल–होमस्टे सञ्चालक र स्थानीय सेवाहरू फोन सम्पर्कमा निर्भर हुने भएकाले नेटवर्क अवरोधले आन्तरिक व्यवस्थापनलाई समस्या पार्ने गरेको छ।
४२ सय मिटरको उचाइमा पर्ने पिके डाँडाबाट सगरमाथा सहित ८ हजार मिटरभन्दा माथिका विभिन्न हिमशृङ्खलाहरू नजिकबाट निकाल्न सकिन्छ। समस्या समाधानका लागि मन्त्रालयमार्फत टेलिकम सक्रिय भएपछि अब ज्वालामाई र पिके क्षेत्रमा सञ्चार पूर्वाधारका काम तीव्र रूपमा अघि बढ्ने, टावर निर्माण पुनः सुरु हुने र मोबाइल सेवा स्थायी रूपमा सुधारिने अपेक्षा गरिएको छ।
