काठमाडौं । ब्रिटिस एजुकेशन ग्रुप (बिइजी) अन्तर्गत सञ्चालित द ब्रिटिस कलेज (टिबिसी) ले ब्रिटिस एक्रिडिटेसन काउन्सिल (बिएसी) बाट पुनः मान्यता प्राप्त गरेको छ। कलेजले स्वतन्त्र उच्च शिक्षा संस्थाका रूपमा उक्त अन्तर्राष्ट्रिय मान्यता नवीकरण गराएको हो।
कलेजले नेपालमै पहिलो तथा हालसम्मको एकमात्र शैक्षिक संस्थाका रूपमा बिएसीको मान्यता कायम राख्न सफल भएको जनाएको छ। कलेजका अनुसार उक्त मान्यता सन् २०३० मे ३१ सम्मका लागि मान्य रहनेछ।
मान्यता नवीकरण प्रक्रियाका क्रममा बेलायतबाट आएका निरीक्षकहरूको टोलीले कलेजको शैक्षिक कार्यक्रम, अध्यापनको गुणस्तर, संस्थागत सुशासन, विद्यार्थी सहयोग सेवा, शैक्षिक स्रोतसाधन, भौतिक पूर्वाधार, अनलाइन शिक्षण व्यवस्था, अतिरिक्त क्रियाकलाप तथा स्नातकहरूको रोजगारी सम्भावनालगायत विभिन्न पक्षको विस्तृत मूल्याङ्कन गरेको थियो।
सन् १९८४ मा स्थापना भएको बिएसी स्वतन्त्र उच्च तथा थप शिक्षण संस्थाहरूको गुणस्तर मूल्याङ्कन गर्ने प्रतिष्ठित अन्तर्राष्ट्रिय निकायका रूपमा परिचित छ। यसको मान्यतालाई शैक्षिक गुणस्तर, पारदर्शिता, सुशासन तथा संस्थागत उत्कृष्टताको अन्तर्राष्ट्रिय सूचकका रूपमा लिइन्छ।
उक्त मान्यता प्राप्त गर्न संस्थाले सुशासन, रणनीति तथा वित्तीय व्यवस्थापन, शैक्षिक तथा प्रशासनिक व्यवस्थापन, शिक्षण तथा मूल्याङ्कन, विद्यार्थी सहयोग तथा मार्गदर्शन, भौतिक पूर्वाधार तथा सिकाइ स्रोतसाधन र गुणस्तर व्यवस्थापन तथा सुधारलगायत छ प्रमुख क्षेत्रमा तोकिएका मापदण्ड पूरा गर्नुपर्ने हुन्छ।
द ब्रिटिस कलेजका एकेडेमिक डिन डा. डेक्लान पी. ब्याननले पुनः मान्यताले कलेजको शैक्षिक प्रणाली, प्राध्यापक तथा कर्मचारीहरूको समर्पण तथा अन्तर्राष्ट्रियस्तरको शिक्षा प्रदान गर्ने प्रतिबद्धताको पुष्टि गरेको बताए।
यस्तै, द ब्रिटिस कलेज तथा ब्रिटिस एजुकेशन ग्रुपका संस्थापक तथा प्रमुख कार्यकारी अधिकृत राजन कँडेलले नेपालमा यस्तो मान्यता प्राप्त गर्ने पहिलो कलेज हुनु गौरवको विषय भएको उल्लेख गर्दै आगामी दिनमा थप अन्तर्राष्ट्रिय असल अभ्यासहरू अवलम्बन गरी उच्च शिक्षाको विकासमा योगदान पुर्याउने प्रतिबद्धता व्यक्त गरे।
बिएसीकी उपप्रमुख कार्यकारी अधिकृत लुसी फक्सले उक्त मान्यताले शैक्षिक व्यवस्थापन, गुणस्तर सुनिश्चितता, विद्यार्थी कल्याण तथा संस्थागत सुशासनका क्षेत्रमा कलेजले स्वतन्त्र मूल्याङ्कन सफलतापूर्वक पार गरेको प्रमाणित गर्ने बताइन्। उनले सन् २०२१ देखि बिएसी मान्यता प्राप्त द ब्रिटिस कलेजलाई सफल पुनः मान्यताका लागि बधाईसमेत दिएकी छन्।
कलेजले बेलायती विश्वविद्यालयहरूसँगको सहकार्यमा सञ्चालन गरिएका अन्तर्राष्ट्रियस्तरका शैक्षिक कार्यक्रम, उद्योग क्षेत्रसँगको सहकार्य तथा विद्यार्थीको करिअर विकासमा केन्द्रित अभ्यासमार्फत आफ्नो पहिचान स्थापित गर्दै आएको जनाएको छ।
कलेजका अनुसार हालै केही समूहबाट फैलाइएका भ्रामक सूचना तथा संस्थालाई लक्षित गतिविधिका बाबजुद स्वतन्त्र अन्तर्राष्ट्रिय मूल्याङ्कन प्रक्रियाबाट पुनः मान्यता प्राप्त गर्न सफल भएको हो। कलेजले उक्त उपलब्धिलाई अन्तर्राष्ट्रियस्तरका शैक्षिक मापदण्ड तथा संस्थागत व्यवस्थापन कायम रहेको स्वतन्त्र प्रमाणका रूपमा व्याख्या गरेको छ।
